15-jarige wen Limpopo toernooi
Date:
Read:
Die 15-jarige Cameron Mesmith van Mokopane het stof in die ou-manne se oë geskop toe hy onlangs die Limpopo Closed amateur gholftoernooi gewen het. Cameron is nog altyd lief vir gholf, maar sy spel het drasties begin verbeter toe hy verlede jaar afrigting van TJ Bekker van Gapps Golf Academy begin ontvang het. Sy voorgee het in minder as ‘n jaar van 16 na 0 verbeter.
Nadat hy die Limpopo Closed met tellings van 74 en 70 gewen het, is hy gekies vir die Driehoekige Limpopo Amateurspan wat Limpopo eersdaags op Witrivier sal verteenwoordig. Vir ‘n junior is dit ‘n fantastiese prestasie, veral as ‘n mens in ag neem dat hy minder as ‘n jaar gelede nog met ‘n 16 voorgee gespeel het.
Sy aftrigter, TJ, skryf sy sukses aan sy harde werk en toewyding teenoor die sport toe. Cameron vertel dat hy gemiddeld drie ure per dag aan sy gholf afstaan. Hier is hy saam met sy afrigter T.J. Bekker en Schalk Maree. Shalk het onlangs by Gaps Golf Academy aangesluit as assistent-afrigter.
